Bjartur & Sunna & Dagný & Sindri

"Einn gamlan, takk. Ég tek hann með"

2012-02-03T19:13:00.000Z

Það var "gamall dagur" í leikskólanum í dag. Þá mega börnin koma með gamla hluti eða í gömlum fötum í leikskólann. Stelpurnar tóku með sér gamlar ævintýrabækur sem Helgamma sendi okkur einhvern tímann... Það var það eina sem mömmunni datt í hug að þær gætu farið með og voru bækurnar fundnar á síðustu stundu. Allir voru komnir í útifötin og útá stétt þegar hlaupið var aftur inn og náð í bækurnar.
Leið okkar mæðgna (og Sindra) í leikskólann liggur framhjá blokk einni þar sem eldri borgarar búa. Sunna hefur oft talað um þegar hún og álfarnir (elstu börnin) á leikskólanum fóru þangað að syngja fyrir gamla fólkið fyrir jólin. Dagný tengdi þarna vel á milli og sagði þegar við gengum framhjá blokkinni:"Hey við getum bara náð í einn gamlan þarna!"
Við erum búin að hlæja mikið að þessu. Frekar fyndið að redda sér bara einum langafa til að mæta með á "gamla daginn". Þetta var meira að segja í leiðinni og allt!

Hvernig skal leita?

2012-01-22T16:15:00.000Z

Systurnar voru að leika í matreiðsluleik og vantaði eitthvern mikilvægan hlut.
Sunna með mikilli áherslu:"Við þurfum að leita HÁTT OG LÁGT!"
Dagný stendur og meltir þetta orðalag systur sinnar.
Sunna heldur áfram:"ég leita hátt og þú lágt!"

Blíða Dagný

2011-12-24T00:34:00.003Z

Dagný sagði með ofur fallegri röddu:"Þú ert falleg mamma mín".
Mamma (kannast ekki alveg við Skrípóstelpuna í þessum tón):"Ooo... þú líka".
Dagný (með sinni venjulegu, tröllaröddu):" Þú átt að segja TAKK!" (og smá dash af hneykslun líka)
Þannig kannast maður við hana ;o)

Tómatur/túmatur

2011-12-20T23:07:00.002Z

Mamman ropaði og sagði "afsakið". Dagný var á svæðinu þannig að mamman leiðrétti sig strax og sagði "afSKAÐI".
Þá sagði Dagný:"Af hverju sagðirðu "afskaði, afskaði"?".
Hahaha... hún heyrir ekki muninn :o)

Sindri 1 árs

2011-12-19T21:50:00.000Z

Það er víst staðreynd að litli drengurinn okkar er orðinn eins árs! Veit ekki hversu oft við höfum staldrað við í dag og hugsað hvort það geti virkilega verið.... En, jú,jú, Sindri stækkar eins og allir hinir og á ógnarhraða!
Við áttum æðislegan afmælisdag með fjölskyldum okkar og yndislegt að njóta þess að vera saman við kertaljós og jólalög, góðan mat og kökur. Svo verður haldið uppá afmælið fyrir vinina á milli jóla og nýárs og þá verður eflaust meira fjör enda stærri barnahópur þar á ferðinni ;o)

DudduDagný

2011-12-07T22:18:00.001Z

Dagný er nú hætt með snuð loksins. Það hefur gengið vonum framar að fá hana til þess að gefa þetta upp á bátinn... en það hjálpaði henni að eiga yngri bróður sem á líka snuð... það mátti notast við þau þegar fíknin var alveg að fara með hana. Þá tottaði hún í svona hálfa mínútu og sagði svo hæstánægð:"Skoh! Sindra snuddur passa alveg í mig!" Hún kann sko að redda sér þessi stelpa...
En sem betur fer notar hann ekki alveg eins snuð og hún gerði og þess vegna eru þetta SINDRA snuddur, ekki hennar. Og allir sáttir með það ;o)

Ungfrú Dagný Skrípó

2011-12-03T22:25:00.001Z

Dagný vildi fá að sofna í mömmurúmi og auðvitað var það alveg sjálfsagt. Nema litla skrípóstelpan læðist svo inní sitt herbergi og er að ná sér í bækur til að lesa. Mamman nappar hana og segir henni að það sé ekki í boði að lesa í mömmurúmi núna. Klukkan orðin svoldið margt og skrípóið átti að sofna sem fyrst. Henni var nú samt boðið að lesa í sínu eigin rúmi (mamman alveg viss um að hún myndi afþakka það því mömmurúm er alltaf best) en hún þáði það... Skreið með nokkrar bækur uppí og lét fara vel um sig. Svo heyrist ekki meira í henni það kvöldið og mamman alveg viss um að hún hafi sofnað yfir bókunum.
Svo þegar mamman sjálf ætlaði að skríða uppí rúm fann hún skrípóstelpuna þar, steinsofandi og með bækurnar sínar! Best var að hún sofnaði með eina í fanginu:"Ungfrú Ráðrík"....
Svo var hún spurði útí þetta morguninn eftir:
Mamma:"Dagný af hverju fórstu með bækur í mömmurúm?"
Dagný:"Bara...."
M:"En ég var búin að segja nei."
D:" Já en þú sást mig ekki...."
Gerði greinilega ekki ráð fyrir því að vera nöppuð steinsofandi með sönnunargögnin allt í kring ;o)

Beturviti

2011-11-29T21:13:00.001Z

Bjartur vildi meina að þegar tunglið væri eins og banani í laginu væri það vegna þess að sólin skín ekki á allt tunglið... sem er svo sem rétt, en þegar mamma hans sagði að það væri vegna þess að jörðin skyggði á hinn helminginn var hann ekki alveg að kaupa það.
Leitað var til pabbans í þessu máli og hann spurður út í þetta. Hann bakkaði mömmuna upp; jú, tunglið er ekki fullt vegna þess að sólin skín á jörðina og þá kemur skuggi á tunglið....
"Nei." segir Bjartur.
"Jú". segja mamman og pabbinn.
"Nei" segir Bjartur aftur.
Pabbinn segir: "Bjartur þú ert svo mikill besserwisser. Það þýðir að þú þykist alltaf vita allt".
"Ég veit! HAHAHAHAHAHA...... " sagði þá okkar maður.... stundum hefur maður ekkert í þetta barn!

Hjallabraut-íska

2011-11-21T23:14:00.001Z

Dagný er skrautleg, það verður ekki af henni tekið. Svo er hún líka svo "dóminerandi" týpa að ef hún segir einhverja vitleysu öpum við það upp eftir henni. Þannig að nú segja allir hér á Hjallabrautinni (þeir sem kunna að tala):
Afskaði í staðinn fyrir afsakið.
Handborgari í staðinn fyrir hamborgari.
Piparpukur í staðinn fyrir piparkökur.
Heimsnokk í staðinn fyrir heimsókn....

Hvað ætli þessi skörungur verði þegar hún verður stór? ;o)

Maður saknar ekki einhvers sem maður veit ekki að er til, er það?

2011-11-07T21:24:00.000Z

Bjartur var að horfa á náttúrulífsþátt um fólk sem býr hátt uppi í trjám regnskóga og byggir sér hús þar uppi. Þátturinn sýndi hversu einfalt líf þessa fólks er og eitthvað fannst okkar manni þetta vera flott líf. Klifur og alls kyns kúnstir við að kveikja eld og svona sem 7 ára strákum finnst svakalega spennandi. Hann segir:"Oh, ég vildi að ég byggi þarna."
Eitthvað fannst okkur foreldrunum þetta fyndið- tölvu og legosjúklingurinn sjálfur!
"Þarna er sko engin tölva!" heyrðist í gamla fólkinu.
Þá segir gáfnastrumpurinn:"Já ef ég byggi þarna þá myndi ég ekkert vita af tölvum, þannig að....."
Hann kláraði ekki einu sinni setninguna. Þetta lá bara í augum uppi!

Fer það eftir stærðinni?

2011-10-25T17:14:00.000Z

Mamma segir reglulega við Dagný:"Ég elska þig mikið."
Þá segir Dagný alltaf:"Elska þig lítið."
Fyrst var þetta bara fyndið og sætt en eftir nokkur svona svör ákvað mamman að verða agalega móðguð og sár. "Af hverju segirðu alltaf "lítið"?"
Þá kom:"Mamma. Ég er lítil og get bara elskað lítið!"

Sunna sæta sól 5 ára skvísa

2011-10-22T22:56:00.001Z

Við náðum ekki að vekja Sunnulinginn okkar á afmælisdaginn en náðum henni þó í rúminu. Þær systur höfðu sofið saman um nóttina í Sunnurúmi og vöknuðu saman og lágu bara og spjölluðu í rólegheitum þegar pabbi og Bjartur komu með pakkana og sungu afmælissönginn. Sindri og mamma slógust svo í hópinn þegar pakkarnir voru opnaðir. Skvísuföt frá mömmu og pabba og Strympubangsi frá Bjarti stórabróður.

Svo var tekið til við að klæða þær systur og greiða. Sunna valdi sér afmælisföt fyrir leikskólann og skrípóstelpan vildi auðvitað líka fara fín í tilefni dagsins. Afmælisskvísan valdi að baka köku fyrir krakkana á deildinni og, gæðablóðið sem hún er, leyfði hún litlu systur sinni að taka þátt í öllu þessu með sér, sleikja sleikjuna og allt saman. Svo fékk hún glæsilega kórónu og afmælissöng, að sjálfsögðu.

Þegar heim var komið opnaði hún pakka frá Dagný syss og svo var undirbúið pizzapartý fyrir ömmu&afa, Balla frænda og Valgeir&Þyrí. Í eftirrétt vildi hún bjóða uppá banana með bráðnuðu súkkulaði. En það gleymdist eiginlega að græja eftirréttinn því það var svo mikið að gera að föndra með föndurdótið og gaman að hoppa og skoppa í náttfötunum sem amma&afi gáfu. Hann var þó afgreiddur með hraði eftir beiðni (og nokkur tár) afmælisbarnsins og fór okkar kona afar sátt í rúmið eftir æðislegan 5 ára afmælisdag.

Stundum er erfitt að vera alltaf þessi yngri....

2011-10-20T22:47:00.002Z

Sunna var að byrja að æfa fótbolta og auðvitað vildi Dagný þá líka byrja að æfa. Við vorum á heimleið í haustsólinni úr leikskólanum þegar þessar umræður áttu sér stað og langir skuggar mynduðust. Mamman reynir að útskýra fyrir skrípóstelpunni að hún sé ekki alveg nógu stór ennþá til að byrja í fótboltanum...Þá segir Dagný afar sannfærandi, eins og svo oft áður:"Jú, mamma! Sjáðu skuggann minn. Hann er nógu stór!" .........og hvað segir maður þá? ;o)

tvær er betri en ein....

2011-10-18T17:18:00.001Z

Dagný fékk möndlu (nammi) hjá mömmu. Um leið og hún var búin að kyngja bað hún um aðra.
Mamma:"Nei, ekki meira"
Dagný:"En, ég VERÐ að fá aðra. Þessi er bara ein í maganum og vill hitta vinkonu sína!"
Það má reyna ýmislegt... ;o)

Dagný Logadóttir orðin 3 ára!

2011-10-11T23:27:00.001Z

Litla kellingin var vakin eldsnemma í morgun af allri fjölskyldunni. Hún var lengi að vakna, aldrei þessu vant. Mátti svo leita sjálf að afmælisgjöfunum sem systkini hennar voru búin að kaupa handa henni. Sú leit gekk fljótt og vel og var þá sett í 5. gír því drífa þurfti liðið í föt og af stað í skóla/leikskóla.
Daman fékk auðvitað að baka sjálf þegar í leikskólann var komið og valdi hún að hafa kremið bleikt. Hún fékk svaka fína glimmer-HelloKitty-kórónu og afmælissöng og naut þess að vera aðalnúmerið í dag ;o) ....ekki það að hún sé það ekki alltaf! hehe.
Þegar heim var komið lék hún sér með afmælisgjafirnar frá krökkunum og beið þess að matargestirnir kæmu. Amma&afi, Balli og Valgeir&Þyrí voru boðin í afmælismat sem afmælisbarnið mátti velja og bauð hún uppá dýrindis grjónagraut, flatkökur með hangikjöti og slátur. Í eftirrétt var svo súkkulaðifondue með ávöxtum.
Kvöldið endaði með afmælisbaði eftir að hafa verið með danssýningu fyrir gestina og eftir að hafa leikið sér eeeeendalaust með gjöfina frá ömmu&afa. Búðarkassi með kallkerfi og færibandi og ég veit ekki hvað og hvað... svo spennandi dót að ekki gafst einu sinni tími til að tala við Helgömmu sem hringdi auðvitað í afmælisbarnið í tilefni dagsins!Daman sofnaði svo ofursátt og ofurvært eftir daginn sinn með það á vörunum hvað hún elskar ömmu og afa mikið :O)

Þessi krakki...

2011-09-08T10:17:00.003Z

Hún Dagný er kostuglegur krakki... Svona beið hún í morgun eftir því að komast í leikskólann. Mamman var að greiða Sunnu inná baði og þegar þær komu fram beið Dagný í sófanum. "Ég er alveg tilbúin". Einmitt. Alveg slök bara. :o)

Gömul gullkorn

2011-09-06T13:04:00.002Z

sem poppuðu upp á Facebook:

‎"Hún blessaði með báðum" heyrðist í Sunnu þegar Dagný vinkaði bless í morgun. Hehehehe yndisleg.... 2009, 3. sept

þeir eru skemmtilegir matartímarnir hér á þessum bæ. Dagný t.d. reytti af sér brandarana áðan. Spurði hvern fjölskyldumeðliminn á fætur öðrum hvort þeir vildu bleyju, uppskar mikla gleði hjá systkinunum og hló svo sínum trukka/hrossahlátri sjálf....mamma með bleyju.... hahahaha... það er sko fyndin mynd! 6.sept 2010

Tungubrjótur

2011-08-27T20:26:00.004Z

Dagný á góða vinkonu sem heitir Jana María. En okkar dömu er lífsins ómögulegt að geta sagt nafnið hennar... Eftir mikið ströggl af "Maramaría", "Mana María", "Naramaría", "Jaramanía".... og bara hvað sem er annað en "Jana María" hefur hún nú fundið lausnina:"Maríubjalla!" ..... og það er alveg jafn sætt ;o)

Misskilningur...

2011-08-26T13:00:00.002Z

Sindri vill alltaf vera í kringum krakkana og tautar ánægður þegar hann nær þeim:"mama mama mama..." Verst að Sunna, litla mamma, passar þá svo vel uppá Sindra sinn, tekur hann alltaf upp og kemur með hann til mömmu. "Hann er að kalla á þig." Endar alltaf á því að litli maðurinn verður hundóánægður að fá ekki að vera með... ;o)

Sindri stendur

2011-08-26T12:45:00.004Z

Eitthvað er okkar maður að flýta sér að stækka þessa dagana. Farinn að standa upp hér og þar við mikinn fögnuð stóru krakkanna. Svo vantar bara herslumuninn að skríða á fjórum. Því að silast eitthvað áfram á fjórum fótum þegar maður þarf sko að flýta sér á eftir krakkahópnum og það virkar svona fínt að skjótast eins og eðla á maganum á eftir þeim? Nei, maður er ekkert að gera neitt í rólegheitum þegar liðið er heima...
Flottast finnst Bjarti þegar Sindri kemur skríðandi eins og hermaður í leyni og dregur svo undir sig lappirnar og sest svo upp. "Mamma! SÁSTU þetta?!", segir hann í hvert e i n a s t a skipti, alltaf jafn stoltur.

Sindri kominn með tönn.

2011-08-23T09:19:00.006Z

Það er nú best að skrásetja það svo maður muni þetta ;o)
Drengurinn er búinn að hafa mikið fyrir að poppa þessari tönn upp. Þ.e.a.s. hefur haft mikið fyrir að gráta og vera pirripú. Mamman hefur aðallega fundið fyrir því. Ekki getað lagt hann frá sér nema augnablik, rétt til að ganga frá þvottinum. Nú hugsar Grandma Bench: "meiri lygin, ég er alltaf að ganga frá þvotti þarna!" en þvotturinn er bara svona mikill mamma mín!! ;o)
Svo er bara að vona að ekki verði eins mikið fyrir næstu tönnum haft.... svona eins og að fæða fyrsta barnið: það er erfiðast og ryður leiðina, vont en það venst og allt það

Dónaskapur...

2011-08-15T22:30:00.003Z

Saga úr leikskólanum:
Krakkarnir fengu krítar í útiverunni og einhverjir höfðu krítað á veggina á leikskólanum. Þá heyrist í Miss D:"Hver er að krrrooota svona á vegginn? En dónalegt!"

Þess má geta að Dagný er eina barnið okkar (hingað til) sem hefur tekið sig til og krotað á veggi heimilisins.....ítrekað!

Fegursti fífillinn?

2011-08-15T22:28:00.001Z

Dagný spurði aaafar væminni röddu:"Mamma? Er ég ekki fallegasta blómið þitt?"
Hún kann að bræða mann þessi stelpa

Dagný dúll, mamma klikk

2011-08-15T22:17:00.003Z

Dagný dúll er ekki kölluð dúll fyrir ekki neitt. Auk þess hversu mikil dúlla hún er, kann hún sko að dúlla sér!
Og hún var að dúlla sér við litlu fígúrurnar sínar einn morguninn og hlustaði ekki nógu vel á mömmu sína þegar hún var að biðja hana um að flýta sér:
Mamma:"Dagný, komdu og drífðu þig að borða morgunmatinn þinn."
Dagný:"Já, ég er bara aðeins að leika mér."
M:"Nei, komdu strax. Við erum að fara svo í leikskólann. Sýndu nú dýrunum þínum hvað þú ert dugleg að borða. Þau langar svo að sjá hvað þú ert dugleg. Þau segja: Dagný, komdu að borða. Sýndu okkur."
D:"NEI. Þau kunna ekki að tala!!!!! (alveg með sinni kröftugu hneykslunar rödd).
Mamman aaaaaaaalveg að missa þolinmæðina....
Dagný heldur áfram að dúlla sér og spjallar við dýrin og þau "svara" henni.
M:"Nú? Kunna þau NÚNA að tala?
D:"NEI!! ÉG er að segja þetta!!" Enn hneykslaðri á auðtrúa mömmu sinni.

Tómatar vs. Súkkulaði

2011-07-29T21:46:00.002Z

Sunna var svo dugleg að borða fiskinn sinn og til að hvetja hana til að klára alveg af diskinum bauð mamman konfekt-tómata í verðlaun. Daman sem er sjúk í grænmeti var ekki lengi að skófla í sig restinni en segir svo:"Mamma. Þú veist að ALVÖRUverðlaun eru súkkulaði..."
Lét samt tómatana duga ;o)

Gordjöss...

2011-07-26T23:10:00.005Z

Dagný var að setja nýtt met í krúttlegheitum og var spurð:"Af hverju ertu svona sæt?!"
Þá toppaði hún sig enn einu sinni og sagði:"Nei. Ég er glæsileg!"

Dagný við matarborðið:

2011-06-20T20:53:00.003Z

"Þið megið ekki borða svona mikið! Þið fáið bara feitar kinnar!"

rassamerking

2011-05-16T23:03:00.003Z

Mamma er að stríða Dagnýju og segir:"sjá þennan sæta rass! Ég á þennan rass!"
Dagný er sko ekki sátt við það:"NEI! ÉG á hann!"
M:"Nei ÉG!"
D:"Nei þú ert með rass!"
M:"já þú átt hann og ég á þinn".
D:"Nei, ég á minn! Það stendur ÉG á honum!"
Þar með var mamman sigruð ;o)

í loftinu hangir...?

2011-05-16T22:56:00.002Z

Einhver galsi var í Dagnýju og Bjartur var líka búinn að vera ofurhress og glaður.
Mamman segir þá:" Hvað er eiginlega í loftinu?"
Þá svarar Dagný með hneykslun í röddinni:"Ljós!"
Mamman og Lilja frænka fara að hlæja. Já auðvitað er ljós í loftinu... en okkar kona finnur samt á sér að hún hafi verið að svara einhverri vitleysu og bætir við:"...eða skrítin fluga eða bara hvað..." (segir alltaf bara "hvað" í staðinn fyrir "eitthvað")

Lyklabarn?

2011-05-16T22:53:00.003Z

Dagný fann lykil í dótinu. Kom sigri hrósandi og sýndi mömmu sinni lykilinn.
D:"Mamma. Ég fann lykil!"
M:"Vá, en fínt."
D:"Þetta er samt ekki lykillinn að Sindra. Hann er bara fastur við þig".
Spurning hvernig á þá að losa Sindra frá mömmunni... ;o)

Maður er inni í innifötum og úti í útifötum!

2011-05-16T22:50:00.002Z

Pabbi:"Dagný, ekki fara inn á skónum"
Dagný fer þá úr skónum í forstofunni. Á meðan labbar pabbinn inn úr forstofunni með húfu.
Þá heyrist í okkar konu:"Pabbi! Ekki fara inn á húfunni!"

Dagný alltaf saklaus

2011-05-16T22:44:00.002Z

Dagný sat að kúka og fór auðvitað að fikta í klósettrúllunni. Þegar mamman kom og kíkti á hana var klósettpappír útum allt gólf. Mamma:"Hvað gerðist hérna eiginlega?"
Dagný alveg búin að setja geislabauginn upp:"Ég veit það ekki!"
M:"Hver gerði þetta?"
D. mjög hneyksluð:"EKKI ég!!"
M:"Hver þá?"
D:"Sunna! ..... en þú mátt samt ekki skamma hana".
Litla skessan hafði það sem sagt ekki alveg í sér að láta skamma systur sína fyrir eitthvað sem hún sjálf gerði... ansi góð ;o)

Hver er fullorðin?

2011-05-16T22:42:00.002Z

"Þú kallar svo bara á mig, pabbi, og ég kem og skeini!" Sagði Dagný (2 ára) þegar pabbi hennar sat á dollunni. Pabbinn gat ekki annað en svarað (mjög hissa):"Já..... ok...."

Týnt-ið... er það einhver staður?

2011-05-16T22:38:00.003Z

Dagný bað um naglalakk sem hún fékk.... Daman var þó ekki lengi að byrja að kroppa það af. Þegar mamman spurði hvað hún væri að gera, svaraði hún:"Ég er bara aaaaaðeins að færa naglalakkið".
Mamma:"Færa það??"
Dagný:"Já, færa það í týntið..."
Það sem er í gangi stundum í höfðinu á þessari stelpu... ;o)

Sindri að mannast

2011-04-26T20:34:00.002Z

Sunna var að leika við Sindra. Litli maðurinn í miklu stuði og þá heyrist í henni:"Sindri er orðinn mennskur!! Því hann er að hlæja!"

Sunna í pælingum

2011-04-19T22:49:00.001Z

"Mamma. Þú ert líka krakki."
"Nú?"
"Já, því amma og afi eiga þig."

af-SKAÐI

2011-04-19T22:45:00.002Z

Dagný leikur mannasiðalöggu hér alla daga. Ef einhver ropar eða prumpar segir hún strax:"segðu AFSKAÐI!"
Ansi gott orð... og restin af fjölskyldunni farin að nota það í staðinn fyrir það gamla ;o)

Mælikvarði Dagnýjar

2011-04-19T22:31:00.003Z

Dagný getur verið smá ákveðin. Hún gerir það sem hún ætlar sér að gera, hvað sem hver segir! Og uppáhalds setningin hennar þegar einhver reynir að skipta sér að: "þetta er allt í lagi. Það er enginn að grenja."
Þetta er svo lógískt... það er enginn að grenja... óþarfi að vera með eitthvað vesen..

Nýjar myndir

2011-02-06T23:44:00.004Z

Pabbi er búinn að setja inn nýja myndir í nýtt albúm, þannig að allir viti nú af því ;)

Að drepa tímann...

2011-01-19T18:41:00.002Z

Bjartur, Sunna og mamma að spjalla í eldhúsinu:
M:,,Nú er ég alltaf heima með Sindra."
S:,,Af hverju?"
M:,,Af því að Sindri er svo lítill. Hann má ekki fara á leikskóla strax".
S:,,Hvenær má hann byrja á leikskóla?"
M:,,Þegar hann verður eins árs þá förum við saman á leikskólann."
S:,,Hvenær verður hann eins árs?"
M:,,Þegar það kemur desember. Hann á afmæli 19. desember."
Sunna situr smástund hugsi...
Svo segir hún:,,Má ég sópa gólfið?"
Þá segir Bjartur:,,Sópa svo tíminn líði hraðar? Hahahahaha..."
Algjör brandarakall :o)

lítill harðstjóri

2010-12-29T23:52:00.001Z

Dagný las yfir mömmu sinni:,,Þú mátt ekki segja nei. Það má ekki segja nei við mömmu sína! Það má ekki segja nei..." Þetta endurtók hún í sífellu. Mamman þagði bara og barðist við að halda niðrí sér hlátrinum. Þegar sú stutta var búin með reiðilesturinn sagði mamman við Helgömmu:,,Það er bara verið að taka mann á teppið."
Þá segir Dagný:,,Nei! ÉG tek teppið!" og tók teppi sem var í sófanum og henti því í gólfið...
Maður er ákveðin ung dama ;O)
(des 2010)

Fæðingarsaga Sindra

2010-12-19T22:29:00.002Z

Ég var búin að vera með smá seyðing í bumbunni síðan um morguninn þennan fagra sunnudag. Orðin þreytt og spennt að ljúka þessu bara af, einn dagur í settan dag… jólin á næsta leiti og svona…

Mamma og pabbi kíktu í heimsókn rétt um 3 og við Logi ákváðum að nýta tækifærið og skjótast inná Hreiður til að láta að tékka á mér… Ég var alveg viss um að vera komin með einhverja útvíkkun. Bíðandi eftir einhverjum verkjum þó, því fæðing Dagnýjar var mér svo fersk í minni… þá var sóttin svo hörð.

Í bílnum flaug allt í einu í huga minn fæðingin hennar Sunnu. Hún var svona: Bara smá seyðingur og fyrr en varði var hún fædd!

Það voru vaktaskipti þegar við komum svo við biðum á ganginum sallaróleg. Hver kemur þá arkandi á vakt nema Annaljósa okkar! Það voru fagnaðarfundir. Hún sagðist auðvitað sjá um þetta allt saman og við færum ekki aftur heim nema með barnið í fanginu.

Hún tékkaði á útvíkkun og það var eins og okkur var farið að gruna. 7-8 cm og biðin okkar eftir fjórða molanum styttist. Enn voru þó engir verkir komnir og vildi Anna bíða eftir hríð til að hreyfa þá um leið við belgnum... eða hvað það var sem hún ætlaði, hún kann allavega sitt fag ;o). Ég fékk nefsprey… eitthvað sem átti að koma öllu betur í gang… en ekkert gerðist.

Þá fórum við inná fæðingarstofu, vatnið látið renna í baðið og nálastungur prófaðar. Þá fyrst fór mín að finna fyrir einhverju! Leit á klukkuna. 16:20. Vonandi verður barnið fætt um kvöldmatarleytið. Vildi komast sem fyrst ofan í vatnið en stoppaði stutt þar. Belgurinn var sprengdur og við það kom óvenju mikið blóð þannig að uppúr þurfti ég og um leið og ég stóð upp fann ég fyrir að barnið var að koma. Núna.

Náði þó að staulast í rúmið og hviss, bamm, búmm. Fæddur drengur kl. 16:51. 3475gr og 52 cm. Og enn langt í mat ;o)

Þetta gekk mjög hratt og hljóðlega fyrir sig. Í þetta sinn náði ég ekki einu sinni að fá glaðloft! Við segjum alltaf að Sindri hafi læðst í heiminn, þetta var svo átakalaust. Enda miklir reynsluboltar hér á ferð með frábæra ljósu!

Gömlu kellurnar

2010-12-09T00:29:00.002Z

Heyrðist út úr herbergi þar sem stelpurnar voru með teboð handa dúkkum & böngsum:
Sunna: Þetta er alveg dásamlegt hjá okkur
Dagný: Já, svo sannarlega

Stelpur

2010-11-01T23:53:00.003Z

Stóri bróðir fór til Helgömmu um helgina. Pabbi var að rokka niðrí bæ þannig að stelpurnar voru í aðalhlutverki þessa helgina. Áframhald í afmlælisveislum og fleira skemmtilegt. Pabbi er að vinna í að setja inn nýjar myndir en það dregst aðeins þar sem hann þurfti að skrifa á einhverja pappíra fyrir væntanlega litla barnið og svo eru októbermyndirnar svoldið margar =)

Svo kemur Bjartur heim á morgun, reyndar svoldið seint, þannig að við hittum stóra bróðir jafnvel ekki fyrr en morguninn eftir.

yes man

2010-10-18T21:10:00.003Z

Maturinn var alveg að verða til og Sunna vildi fá nammi. Mamman sagði auðvitað nei við því. Litla daman var auðvitað ekki sátt við það og maldaði í móinn.
S:,,jú ég vil víst fá nammi!"
M:,,Nei, það er alveg að koma matur".
S:,,Ég borða ekki þennan mat. Hann er ógeðslegur. Ég vil fá nýja mömmu."
M:,,Alveg sama. Allir foreldrar vilja að börnin þeirra borði hollt og gott. Það segja allir nei við nammi fyrir matinn".
S:,,Þá vil ég fá Já-mömmu og já-pabba!"
(okt. 2010)

Að vita og ekki vita

2010-08-08T21:35:00.003Z

Bjartur er stundum leeeeengi að sofna ;o)
Reglulega spyr hann hvernig hann eigi eiginlega að fara að því að sofna... Þá er svarið alltaf:,,Loka augunum lengi og hugsa um eitthvað fallegt."
Eitt kvöldið gat gáfnastrumpurinn ekki sofnað, kemur fram og spyr hvernig hann eigi að sofna.
Mamma:,,Lokaðu augunum bara. Og hafðu þau lokuð. Ertu alltaf að gleyma þessu?"
Bjartur:,,Já! hvernig á maður alltaf að sofna?"
M:,,Maður hefur bara augun lokuð og hugsar um eitthvað. T.d. það sem maður gerði í dag eða eitthvað fallegt og gott. Áður en maður veit af þá er maður bara sofnaður og farinn í draumaheima."
B:,,Þú getur samt ekki sagt það. "Áður en maður veit af" Af því að maður veit ekki af því þegar maður sofnar..."
Stundum er þessi krakki of klár fyrir mömmuna....

Dýr eða dýr?

2010-08-08T21:30:00.003Z

Nú þegar Bjartur fer ekki lengur með okkur mæðgum í leikskólann fylgjum við honum niðrí skóla á leikjanámskeiðið... svona þegar pabbi getur ekki farið með honum. Á leiðinni þangað síðast fórum við framhjá voða flottu einbýlishúsi með flottum palli fyrir utan. Þá segir Sunna:,,Þarna er heitapottur."
Mamma:,,Já, er það?"
S:,,Já því það er pallur."
Þá segir Bjartur:,,Mamma, er þetta dýra húsið?" (Raðhús sem við skoðuðum einhvern tímann í þessari fasteignaleit okkar, og var með potti á pallinum)
M:,,Nei."
S:,,Jú, ef maður setur dýr inní það!"

"Ég er eins og lítil Toyota"

2010-07-25T21:32:00.002Z

...sagði Sunna þegar hún hjólaði á "fleygiferð" framhjá mömmu sinni með vagninn og Dagný innanborðs. Henni fannst hún vera á svo mikilli ferð =)

Leikskólastrákurinn Bjartur

2010-07-20T08:48:00.002Z

Hérna má finna myndir frá leikskólagöngu Bjarts.

"Má ég fá Jesús"

2010-07-20T08:20:00.000Z

...segir Dagný þegar hana langar í Cheerios =)

Listaverkasýningar

2010-06-19T12:15:00.005Z

Bjartur og Sunna sýna nokkur listaverk frá 2009. Aðallega er um að ræða verk sem gerð voru í leikskólanum á síðasta ári.

Einnig er önnur sýning í gangi þar sem Dagný hefur bæst í hópinn. Þar eru einnig aðallega verk gerð á leikskólanum.

Skoða listaverkasýningu 2009
Skoða listaverkasýninu 2010

Bjartur var að borða Ópal:

2010-05-08T19:58:00.003Z

"Nú getum við andað betur."
Mamma:"Afhverju?"
B:"Af því að Ópal bætir andrúmsloftið".

Sunna og gullkornin:

2010-05-08T19:53:00.002Z

"Dagný getur núna hoppað með losnuðum höndum!"
Þýðing: án þess að halda sér í... ;o)

Sunna í bílnum: "Mamma, kíktu í spegilinn. Sérðu þá mig?"
Mamma: "já"
S:"Nei... þú sérð mig ekki... ég sé mig ekki."
M: "Jú ég sé þig. Núna ertu að klóra þér í nefinu".
S:"Já, ég veit".
Hehehehe.. gott að vita það sem maður er að gera ;o)

Bjartur gáfnastrumpur kemur sífellt á óvart...

2010-04-14T09:23:00.004Z

Sunna hefur nú alltaf verið nett, það er ekki hægt að segja annað ;o) Þvílík písl!
Mamman varð samt gapandi þegar þær systur voru að ramba úti í garði og Dagný hélt stóru systur sinni uppi!! Dagný gengur undir nafninu "Trölla" þessa dagana en það er af öðrum ástæðum en vegna líkamsþyngdar... meira svona í takt við skapið og tröllahláturinn, en litla dýrið sat á rambeltunni og Sunna písl hélst uppi.
"Hvað ertu eiginlega létt??" sagði mamman steinhissa.
Bjartur stóri bróðir var ekki lengi að finna útúr þessu:"Mamma. Sunna situr alveg upp við haldið (semsagt innar á römbunni) og Dagný er næstum því með rassinn út fyrir. Það munar um það!"
SÆLL! Hvaðan kemur þessi krakki?? Hann er SÚPERklár!

"Ég á þessa húfu"

2010-03-27T17:18:00.003Z

...sagði Sunna við systur sína í dag og bætt við "sjáðu, það stendur ÉG inní henni" =)

"Gaggaló"

2010-03-27T17:17:00.001Z

...segir Dagný þegar hún er að kalla á Helgömmu og ef hún leggur áherslu á kallið kemur "Gaggalagó" =)

Nýjar myndir

2010-03-02T00:42:00.003Z

Nú er komin ný myndasíða f. 2010 myndirnar, smelltu hér til að skoða myndirnar frá janúar og febrúar.

Eigum við eitthvað að ræða slenið á þessari síðu?

2010-01-28T20:30:00.002Z

Tímarnir hafa heldur betur breyst núna eftir að húsmóðirin fór að vinna. Nú berst hún til að finna tíma til að brjóta saman þvottinn og þrífa klósettið! Hehehehe.. sérstaklega af því að þessir tímar sem áttu að fara í svoleiðis stúss hafa farið í læknisheimsóknir eftir læknisheimsóknir...

Fyrst fóru allir krakkarnir til háls, nef og eyrnalæknis. Bjartur losnaði við rörin sín, Sunna skoðuð og tekið sýni úr hori og Dagný sett á sýklalyf vegna eyrnabólgu. Það voru mjög hissa foreldrar sem fóru út frá lækninum: Dagný með eyrnabólgu og aldrei kvartar hún. Sefur eins og steinn og er alltaf hvers manns hugljúfi. Svo ræktuðust einhverjar fjórar bakteríur úr Sunnu þannig að hún fór líka á sýklalyf. Vonandi fer þá að minnka hóstinn og horið hér á bæ...

Svo var kominn tími á að einkasonurinn færi í hjartasónar. Við þangað og litli spekingurinn gat spekúlerað og spáð í gjörsamlega ALLT hjá lækninum! Endaði á því að segja honum að það væri sprunga á veggnum hjá honum og að hann þyrfti nú að láta laga þetta! Hann vissi alveg um svona því afi hans væri múraraMEISTARI. Hehehehe læknirinn hló nú bara að þessum litla með brillurnar og hafði gaman af.. En hjartað lítur vel út. Lekinn er allavega ekki meiri en hann hefur verið.

Þá var komið að augnlæknaheimsókn nr.1. Hún kom ekki nógu vel út. Drengurinn sér enn verr. En við eigum eftir að fara aftur og fá nákvæmari mælingu og spyrja lækninn spjörunum úr.... nei ekki alveg...leyfum honum að vera á brókinni.
Næsta heimsókn er næsta miðvikudag og miðvikudaginn þar á eftir fara stóru krakkarnir í klippingu... þannig að hér verður ekki þveginn þvottur fyrr en um miðjan febrúar! Nei, það eru nú ýkjur ;O)

Jæja, komið nóg af þessu pikki (þarf að fara að brjóta saman úr ca einni vél hehe)

Eftir jól

2010-01-14T22:00:00.003Z

Jæja, það er óhætt að segja að þessi síða hafi verið í ansi löngu jólafríi..
Seinni hluti desembermánaðar var vægast sagt annasamur! Brjálað að gera og jólagjöfum, útskriftargjöfum, brúðargjöf og skírnargjöf reddað korteri í jól, jólagrauturinn fékk að malla allan þorláksmessudag og síðustu gjöfum pakkað inn á sjálfan aðfangadag! Hehehehe, já þessi jólin var allt á síðustu stundu... en þau komu nú samt. Þó að húsmóðirin hafi ekki einu sinni haft tíma til að skúra gólfin eða þvo gluggana ;0)

Strax eftir jólin var flogið austur á Seyðis þar sem hver einasti dagur var skipulagður í þaula. Það fyrsta á dagskrá alla daga var að slappa af... og við gerðum það svo sannarlega.... svona eins og maður getur með þrjá krakkaorma ;o)

Við komum svo heim 3. jan. og þann 4. jan gerðist hið óumflýjanlega: Mamman fór aftur að vinna! Smá hnútur búinn að vera í maganum yfir þessu, en auðvitað var æðislegt að hitta vinnufélagana aftur og móttökurnar voru ekki slæmar.
Dagný er svo búin að vera í aðlögun á ungadeild og gengur bara rosalega vel. Stóru krökkunum finnst þetta svo spennandi að hvern morgun núna fer hele familien með Dagnýju á leikskólann þar sem hún er knúsuð og kysst í klessu í fataklefanum áður en haldið er áfram á næstu deild. Já, það er hægt að segja að litla daman fái konunglega fylgd á leikskólann hehehe. Þetta eru mikil viðbrigði fyrir okkur mæðgur... en líka æðislega gaman (svo gaman að brjóta saman þvottinn á kvöldin núna- því það er eini tíminn sem gefst hehe).

Svo eru komnar nýjar myndir af jólunum... í myndaalbúminu auðvitað ;o)

Peningana undir koddann?

2009-12-10T22:02:00.005Z

Bjartur á nokkra tíkalla og krónur í bauk. Hann er oft að telja þessa aura sína og átta sig á hvernig þetta er allt saman upp byggt... Baukurinn hefur átt sinn heiðursess efst á bókahillunni inní herbergi krakkanna, nema nú þegar við skreyttum fyrir jólin var hann færður í gluggakistuna svo að pláss væri fyrir Maríu mey með Jesúbarnið og Jósep á bókahillunni.
Okkar maður er oft leeeeeengi að sofna, hann pælir og pælir og hugsar og hugsar. En í kvöld var hann áhyggjufullur. Svo áhyggjufullur að hann var í vandræðum með að halda aftur af tárunum... "Mamma. Gardínan hreyfist alltaf til því glugginn er opinn. Þá held ég að steluþjófar séu að reyna að komast inn og stela peningunum mínum".
Já, það er erfitt að vera ríkur ... og ýmislegt reynt til að fá athygli fyrir svefninn ;0)

Þungur magi

2009-12-05T20:25:00.001Z

Sunna hélt um magann á sér þegar var verið að tannbursta hana í kvöld og sagði
Ég er með þungan maga
Enda var hún búin að borða vel um kvöldið og fylla vel ofaná með ís =)

Bið sem styttist ei neitt... en nóg að gera samt

2009-12-03T21:01:00.005Z

Jæja, okkur gengur nú vel í jólaösinni. Búin að fara að sjá Bjart og hina álfana syngja í helkulda. Bjartur kom í Fjarðarpóstinum og allt ;o)
Svo fórum við að sjá Söngvaseið sem var alveg æðislegt og gaman að fara með Herra spurulum :0)
Í dag fóru krakkarnir og skreyttu jólatré í Jólaþorpinu, á morgun er rauður dagur í leikskólanum og þau mega koma með jólasveinahúfur líka. Sunna fer í leikhús að sjá Maríuhænuna með hópnum sínum og á laugardaginn fær hún að sjá hana aftur með okkur fjölskyldunni! Þvílík tilviljun.

Allt er orðið jólaskreytt hérna hjá okkur, komin aðventuljós og stjörnur í glugga. Jólastelpan gamla komin á sinn stað með snjókarlinum syngjandi sem Sunna var sjúklega hrædd við í fyrra. Hún er nú ekki vitund hrædd við hann núna en það sem Bjartur gat strítt henni á þessu. Hann reyndi líka núna en stelpan er orðin svo stór og hugrökk... Dagný er ekki heldur hrædd.. en samt ekki alveg sama heldur... Alltaf þegar hann fer í gang rekur hún tunguna út úr sér og sveiflar henni til hliðanna. Það er ekkert smá fyndið!

Svo eru dagarnir taldir... Það er talið að jólum með jóladagatalinu sem krakkarnir fengu. Það er talið að því þegar jólasveinarnir koma til byggða með jólasveinabók sem Bjartur fékk. Það er talið að Seyðis og að lokum talið að afmælinu hans Binna sem er á gamlársdag.... Þetta er endalaus bið hehehehe

Mikið að gera

2009-11-25T15:13:00.004Z

Nú strax fyrsta í aðventu byrjar fjörið og hættir ekki fyrr en á nýju ári barasta! Það er engin smá dagskrá framundan hjá fjölskyldunni.... varla tími til að skreyta í rólegheitum en við ætlum nú að setja okkur það markmið að reyna að anda rólega fram að jólum.

Næsta laugardag syngur Bjartur ásamt álfunum á Víðivöllum niðrá smábátahöfn þegar kveikt verður á jólatrénu.
Svo daginn eftir förum við Bjartur með Lilju og Svölu að sjá Söngvaseið. Ekki nóg með það... þá er Hallur afi er búinn að gefa okkur miða á 3 sýningar í leikhúsið! Við förum að sjá Sindra silfurfisk, Maríuhænuna og Leitin að jólunum. Geri aðrir betur hehehe.

Einhvers staðar á milli leiksýninga á að baka, skreyta, pakka inn gjöfum, fara í jólamat, á jólatónleika, fara í jólaþorpið, hitta góða vini, skrifa jólakort, pabbinn að spila og mamman að túttast með vinkonum, kaupa jólatré snemma því strax eftir jólin heldur fjörið áfram á Seyðis! Þar verða önnur jól því það á ekki að senda neina pakka á milli með pósti... bara afhenda þá í eigin persónu. Svo er brúðkaup og áramót!!!

Það verður forvitnilegt að vita hvort þetta standist allt saman ;0) Læt ykkur vita hvernig gengur hehehehe...

Lykt af snjókomu

2009-11-24T09:52:00.001Z

"Pabbi, finnurðu lyktina af snjónum, það mun koma snjór í dag." sagði Bjartur í morgun á leiðinni í leikskólann. Hann var alveg klár á því að "lyktin" af kuldanum þýddi að það myndi snjóa í dag.

Langt prump?

2009-11-17T20:58:00.008Z

Þeir sem þekkja Bjart vita að hann getur verið svoldið lengi að hlutunum.... Okkar maður var að fara að sofa og tók sinn tíma í að leggjast á koddann....
Mamma:,,Leggstu niður svo ég geti breitt yfir þig Herra Lengi."
Bjartur:,,Af hverju Herra Lengi?" (kom alveg af fjöllum sko).
M:,,Bara... af því þú ert svo lengi að öllu".
B:,,Nei! Ég er ekki lengi að prumpa!"
Hahahahaha....

Og veikindin halda áfram....

2009-11-12T09:19:00.002Z

Já, við vissum það svo sem. Biðum bara eftir að næsti grís veiktist og sá grís er Sunna. Þetta er nú ekkert alvarlegt. Smá hiti og killer lykt útúr henni. Sem segir manni að hún sé með hálsbólgu. Dagný er alsæl með að hafa hana heima, loksins einhver annar en mamma til að leika við á daginn.
Verst er að Sunna er búin að vera í smá fitun. Fær sérmeðferð á leikskólanum: Smjörva í stað Létt og laggotts, nýmjólk í stað léttmjólkur...bara nákvæmlega sama og hér heima. Hún var orðin svo fín stelpan en nú fer eitthvað lítið fyrir matarlyst. En gott að hafa forða... þetta eru nú meiri áhyggjurnar! Það er gott að maður er bara með áhyggjur af smámunum- ég segi ekki annað. Hún er bara svo mikil písl.
Maður gerir ekki annað en að bjóða henni hitt og þetta. En hún vill sem minnst borða og biður svo um mömmuknús.

Annars vex spennan fyrir jólunum og aðallega Bjartur aðeins farinn að pæla í gjöfum og svona. Farinn að rukka um jólaljós og skraut. Það kemur víst að þessu öllu saman áður en maður veit af!

Áframhaldandi veikindi

2009-11-09T11:06:00.002Z

Dagný tók við veikindunum af Bjarti... varð bara miklu veikari. Var með 40 stiga hita í þrjá daga. Svo alltíeinu jafnaði hún sig og er aftur orðin hún sjálf. Brosandi og skemmtileg.
Mamman á bænum tók svo við. En bara í 2 daga. Með eyrnabólgu eins og krakkaskítur og hálsbólgu dauðans! Sem betur fer er hún þó að skríða saman núna enda enginn tími fyrir svona vitleysu. Alltaf nóg að gera hér á bæ.
Sunna og pabbinn eru þó eftir í þessari veikindahrinu en vonandi sleppa þau. Mímir (jurtate úr jurtaapótekinu) er orðinn besti vinur okkar hérna og heldur í okkur lífinu.

Í gær var víst feðradagurinn. Hann fór nokkurnveginn framhjá okkur í þessum veikindum. Við náðum þó að elda góðan mat og hafa sjeik í eftirrétt. Krakkarnir þurftu bæði að hringja svo í afa og bjóða honum í morgunmat á leikskólann í tilefni af feðradeginum. Og samt var búið að nefna það nokkrum sinnum við hann áður sko... Ef hann hefði svo endað á að klikka á að mæta hefðum við haldið að það væri bara eitthvað að hausnum hans! hehehehe Nei, nei hann mætti sko hress hingað í morgun og labbaði með liðinu útá leikskóla (pabba var auðvitað líka boðið í morgunmatinn). Dagný og mamman vinkuðu af svölunum eins og vanalega. Það kemur að okkur seinna þegar mæðradagurinn er. Þá er okkur boðið í morgunmat ásamt ömmu.

The olden days

2009-10-29T21:26:00.012Z

Bjartur er nú búinn að vera veikur í nokkra daga... eða nætur eiginlega. Hann er úber hress á daginn, slappast á kvöldin og heitastur á nóttunni. Þannig að mamman (og pabbinn eitthvað líka) er búin að vera sveitt að hafa ofanaf fyrir litla spekingnum... Kubba, teikna, leika alls kyns leiki eftir óskiljanlegum reglum Bjarts og síðast en ekki síst horfa á dvd myndir frá því hann sjálfur var nýfæddur og kjút. "Með lítinn bibba", eins og hann segir sjálfur.

Þegar amma og afi hittu litla manninn í fyrsta skipti var það auðvitað fest á "filmu" og haft með í dvd-myndinni. Þegar hann horfði á það atriði varð hann svaka hissa á því að amma og afi litu nú bara svipað út þá og þau gera í dag, heilum 5 árum síðar... svo kom gullkornið:"Vá! Það er styttra í gamla daga en ég hélt! Amma og afi voru til í gamla daga.....og samt eru þau ekkert svo gömul!

Góður sunnudagur

2009-10-25T16:07:00.002Z

Þessi helgi var spileríhelgi hjá pabbanum á bænum. Best finnst okkur krökkunum að fara þá á morgnana eitthvað í heimsókn og vera aðeins framyfir hádegi svo hann fái frið til að sofa gamli kallinn.

Laugardagurinn hófst á dansæfingu hjá Sunnu. Svo var komið heim og klárað að klæða restina af krökkunum og allir drifnir í heimsókn til Emils Gauta og Gústafs Bjarna. Þar var leikið og leikið... nema Sunna sofnaði í sófanum og Dagný var sett útí vagn fyrir lúr nr.2 þann daginn. Þegar við komum svo heim kúrðu Bjartur og mamman yfir einni Mikka mús mynd og svo var strollan klædd aftur og í matarboð til ömmu og afa. Þar var á borðum dýrindis hreindýrabollur og allt tilheyrandi. Bjartur át manna mest enda kjötbollur uppáhaldsmaturinn hans. Auðvitað fékk svo prinsinn að vera eftir hjá ömmu og afa í dekri og bara tvær prinsessur sem fóru að sofa hér heima það kvöldið.

Í dag, sunnudag, biðum við eftir að Dagný kláraði morgunlúrinn svo við gætum farið að sækja Bjart. Hún svaf þá alla leið til hádegis, bara svona af því að maður var að bíða ;o)
En þegar hún vaknaði drifum við stelpurnar okkur til ömmu og afa að sækja drenginn. Eftir nokkrar skálar af CoCo puffs gátum við drifið okkur aftur heim að leika. Enduðum svo á því að baka tvöfalda uppskrift af amerískum pönnukökum og þær étnar jafnóðum með vel af sýrópi.... eða sí-rop (eins og að ropa) eins og Bjartur segir.
Svo er búið að mála, lita og teikna gommu af listaverkum og leika heilu ævintýrin með Músahúsið.

Sunna 3 ára

2009-10-21T15:17:00.007Z

Það var svo gaman hérna eldsnemma í morgun! Okkur tókst nú ekki að vekja afmælisbarnið- hún vaknaði sjálf við umganginn í pabba og Bjarti þegar þeir voru að ná í afmælisgjöfina hennar. Gjöfin var auðvitað rifin upp og allir krakkarnir þvílíkt spenntir yfir henni. Það sem leyndist í pakkanum var Músahús Mikka og allar fígúrurnar (Mikki mús, Minna mús, Guffi, Andrésína, Andrés, Dúlli, Hjálparhöndin og Plútó).

Þið getið alveg ímyndað ykkur hvernig það var svo að klæða liðið og reyna að fá þau til að fara í leikskólann! En, jújú. Það hafðist að lokum. Sunna auðvitað spennt að mæta í kjól og fín og fá kórónu og baka köku. Bjartur fór með bindi í tilefni dagsins.

Í kvöld verður boðið uppá uppáhaldsmatinn hennar Sunnu, sem er pasta og hvítlauksbrauð. Svo verður auðvitað fondue í eftirrétt.

Afmæli, afmæli

2009-10-12T21:04:00.002Z

Þá er Dagný okkar orðin 1 árs. Það er alveg ótrúlegt hvað þetta ár er búið að líða hratt! Þegar hún kom í heiminn vorum við búin að búa okkur undir að það yrði sko meira en nóg að gera og héldum að við gætum bara varla ráðið við þetta allt saman. En þessi stelpa er eitt það rólegasta barn sem við vitum um... Alltaf eins og ljós, enda kannski ekki annað hægt með tvö ung eldri systkini... Svo er hún alltaf með bros á vör og hvers manns hugljúfi.

Hún var sko flott á afmælisdaginn. Labbaði alveg úr eldhúsinu og inní hol (svaka vegalengd sko, hehe) Hún er nú búin að vera að dunda sér við það að labba svona síðustu daga og alltaf sleppt sér meira og meira, en þegar maður er orðin eins árs þá er ekki hægt að vera eitthvað að passa sig of mikið. Og núna röltir skvísan bara um glöð og ánægð með sig. Verður ábyggilega fljót að fara að hlaupa bara.... svona til að geta verið með krökkunum.

Eitthvað vorum við foreldrarnir í vandræðum með hvað ætti að gefa litlu dömunni í afmælisgjöf en það vandamál er nú leyst. Stelpan verður að eiga dúkkukerru eins og stóra systir fyrir dúkkuna sem Helgamma gaf henni. Þá verður sko hægt að fara í göngutúr!

Dúkkan fékk nafnið Ella um leið og Dagný sá hana. Hún var að heilsa henni og sagði "halló" á sínu barnamáli. Stóru krakkarnir tóku því strax sem að Dagný vissi hvað þessi dúkka héti, og hún héti Ella. Svo núna segir Dagný alltaf Ella, Ella við dúkkuna en enginn veit hvort hún er að heilsa eða hvað?? Hehehehe...

Svo styttist nú í að Sunnasól eigi alvöruafmæli þó svo að búið sé að halda veisluna... En hún fær að halda aftur afmæli hér heima með okkur, fær pakka frá fjölskyldunni og svona og svo auðvitað afmælisdag í leikskólanum. Það er nú meira sportið og svo æðislegt að sjá montnu afmæliskrakkana eiga sinn dag á leikskólanum sínum, með kórónu og allt... svona aðalnúmerið í einn dag ;o) Það á nú vel við hana Sunnu.

Það koma vonandi fljótlega inn myndir úr afmælinu.. Pabbinn sló persónulegt met í myndatökum því það þurfti að taka svo margar myndir til að við gætum almennilega fylgst með (svona eftirá) hver gaf hvaða systur hvað....

Heilabrot

2009-09-27T10:23:00.004Z

Pabbi og Bjartur voru að spekingast inní eldhúsi eitt kvöldið.
Pabbi:,,Bjartur, hvað verður Sunna gömul þegar Dagný verður 5 ára?"
Bjartur hugsar sig um.....
Pabbi:,,Manstu, Sunna er tveimur árum eldri en Dagný."
Bjartur:,,já....7ára?"
Pabbi:,,Já. En hvað verður þú þá gamall?"
B:,,9 ára."
Hugsar sig svo um stutta stund....
,,Þá verð ég búin að eiga hamstur í eitt ár."
Hann ætlar ekki að sleppa þessu drengurinn!
(Bjartur 5 ára, sept 2009)

Að ferðast í sápukúlu??

2009-09-27T10:18:00.002Z

Mamman ákvað að fara í göngutúr til Möllu með krakkana svo pabbinn gæti sofið eftir spilerí um nóttina. Allir voru að gera sig reddý, klæða sig og svona... og finna sápukúlur sem Sunna vildi endilega fara með.
Bjartur ætlaði að hjóla, Dagný í kerrunni en hvað með Sunnu?
Mamma:,,Sunna ætlar þú að hjóla?"
Sunna:,,Nei..."
M:,,Ætlarðu að labba?"
S:,,Nei..."
M:,,Nú, hvað þá?"
S:,,Ég ætla að sápukúlast..."
(Sunna alveg að verða 3 ára sept. 20009)

Ljósir lokkar og bleikir lokkar

2009-09-22T20:25:00.006Z

Það hefur nokkuð lengi verið á dagskrá að setja göt í eyrun hennar Sunnu... Gerðum eina tilraun í skartgripabúð hérna í Hafnarfirði þar sem okkur var neitað um þjónustu.

Í dag fórum við svo inní Smáralind í Mebu og fengum þessa fínu, bleiku lokka! Sunna var sjálf harðákveðin í að vilja fá göt (reyndar segir hún að þetta séu ekki göt í eyrunum, heldur eyrnalokkar í eyrunum!) og var alveg sama hvað mamman sagði. Reyndi að útskýra að þetta væri svoldið vont en þegar mín var búin að velja þessa bleiku (mánaðarsteinn október) var ekki aftur snúið. Eyrnasneplarnir voru sótthreinsaðir vel, tússað á þá og svo var skotið! Bæði eyrun í einu. Það komu nokkur tár sem hurfu um leið og hún skoðaði sig í speglinum. Það sem henni finnst hún flott núna!

Um leið og við komum heim kom Bjartur hlaupandi fram á gang og spurði:,,Hvað kom mikið blóð?!" hehehehe þessir gaurar!

Æfingar

2009-09-14T21:09:00.005Z

Þá er Sunnasól búin að fara í fyrsta ballerínutímann. Þvílíku dúllurnar sko! Hún var auðvitað langflottust og með þeim efnilegri í hópnum. Þarna á mín sko heima. Nú þurfum við bara að redda almennilegu æfingadressi á skvísuna.... Mamman er að vinna í þeim málum ásamt Helgömmu.

Bjartur er líka búinn að fara nokkur skipti í Boltaskóla Haukanna og gengur þessvegna ekki á jörðinni lengur. Honum finnst hann svo flottur að vera orðinn svona æfingagæi að fæturnir snerta ekki jörðina. Hann er líka ótrúlega flottur og gerir allt eins og þjálfarinn segir, mjög einbeittur á svip.

Dagný er að æfa sig í frekjunni ;o) En mamman er með hana í hlýðnibúðum. Hún er orðin uppátækjasöm stelpan... Fer í moldina í blómapottinum inní stofu, tæmir klósettrúlluna inná baði og fiktar í tækjunum inní holi. Hún er svo fyndin með gribbustælana sína... þykist ráða öllu og er mesta krútt fyrir vikið...

Þannig að eins og sést er nóg að gera hjá öllum. Pabbinn búinn að vera sveittur líka að setja inn myndir- komin nokkur ný albúm.
Njótið

Spilagaldur, Sápukúlur og Stökkull

2009-08-30T22:49:00.004Z

Þá erum við aftur komin heim frá Seyðis. Þessi ferð var alveg æææðisleg og spilaði mikið inní að við fórum fljúgandi ;o) En á móti kom að við vorum ekki með bílinn okkar og þess vegna héngum við sem mest bara á Múlaveginum, sem var sko ekki slæmt, og svo þurfti tvo bíla til að sækja okkur. En það var nú lítið mál! Helgamma, Bragi og Rakel biðu eftir okkur þegar við lentum og svo var raðað í bíla og beint í heimsókn til Dags og Ingu að skoða kanínurnar. Svo eftir mjöööög góða Bónusferð var brunað yfir á Seyðis og hreyfðum við okkur varla þaðan.
Mamman og pabbinn fengu að fara í bíó meðan Helgamma passaði. Já, það er bíó á Seyðis, látið ekki svona. Þetta er ekki algjört krummaskuð ;o) Og svo var glæsilegt matarboð hjá Ástu og Símoni og strákunum, kíkt á róló, berjamó og í sund, farið í menningarferð í Skaftfell og í Geirahús .... Alltaf nóg að gera á Seyðisfirði.
Ein af ástæðunum fyrir þessari ferð var að Jóhann og co komu til landsins og þvílíkt stuð. Held að það hafi aldrei verið farið í jafn æsilegan eltingarleik eða borðað jafn mikið af amerískum pönnsum áður ;o) Tala nú ekki um sápukúlublástur!! Sunna setti persónulegt met og fór létt með að smita frá sér áhuganum. Bjartur lærði spilagaldur af Sól frænku og gerði okkur ekkert gráhærð með honum, nei, nei...hehehe. Dagný átti sér eitt markmið daglega. Það var að hrella köttinn. Aumingja Stökkull mátti þola ýmislegt frá henni, m.a. veiðháratog og eyrnaklíp en hann var orðinn ansi góður í að forðast hana í lokin ;o)
Veðrið var nú ekki sem best (eins og svo oft áður þegar við erum þarna) og haustið komið fyrir víst þarna fyrir austan.
En, eins og Helgamma segir, þá erum við ekki að heimsækja veðrið ;o)

Bjartur að horfa á So you think you can dance.

2009-08-17T22:04:00.003Z

Pælir mikið í því af hverju dómararnir og keppendur eru ekki alltaf í sömu fötunum...
Bjartur: Af hverju eru þau alltaf í nýjum fötum?
Mamma: Af því þau skipta alltaf um föt. Þetta eru eins og búningar.
B: Já en dómararnir eru líka oft í nýjum fötum.
M: Já. Þetta er ekki allt sama kvöldið. Þau skipta um föt af því að það er kominn annar dagur.
B: En Dóra (landkönnuður) er ALLTAF í sömu fötunum. Samt kemur nýr dagur hjá henni....

Ekki alveg að kveikja á því að Dóra er teiknimynd. En sýnir tilbreytingarleysið í Dóru sem er sko ekki í uppáhaldi hjá foreldrunum!
(ágúst 2009)

* Nýtt look *

2009-08-15T00:18:00.003Z

Loksins tóku mamman og pabbinn sig til og gerðu síðuna svoldið sæta og huggulega. Þetta er svaka munur! Finnst ykkur ekki? ;o)

Kaldur eplasvali

2009-08-08T14:57:00.004Z

Bjartur fékk kalt epli um daginn og þá heyrðist í spekingum Mmmm, eplasvali...kaldur.

Hættur að hjóla

2009-08-08T14:54:00.003Z

Bjartur tilkynnti okkur um daginn að hann ætlaði að hætta að hjóla þegar hann yrði 8 ára því þá yrði hann svo upptekinn af því að hugsa um hamsturinn sinn. Mamma hans lofaði honum út í lofið að hann fengi hamstur þegar hann yrði 8 ára án þess að gera sér grein fyrir að hann myndi ekki gleyma því loforði =)

Ruglaður bíll

2009-08-08T14:51:00.006Z

Vorum að keyra á malarvegi (sem gerist nú ekki oft) og þá segir Sunna: Bíllinn er ruglaður því henni fannst svo skrítið hvað hann hristist mikið.

Nú er leikskólinn byrjaður aftur...

2009-08-07T10:03:00.002Z

....og allir bara kátir með það hér á bæ. Nema kannski Dagný. Hún saknar stóru krakkanna. Skrítið að hanga allt í einu bara ein heima með mömmu. En við eigum svo sannarlega eftir að eiga skemmtilegt haust með fullt af litlum krúsídúllum á "réttum" aldri fyrir Dagnýju. Jana María er ansi spennandi að koma við og klípa. Svo er mættur litli Michael Fjólar Thorarensen og styttist í Litlu Önnu- og Róbertsdóttur. Svo er von á tveimur félögum í viðbót þegar nær dregur jólum!! Já það verður sko gaman hjá okkur! Ansi aktívir þessir Bónerforeldrar hehehe ;o)

Annars er bara allt gott að frétta af öllum.... Vetrarstarfið byrjar bráðum og það verður nóg að gera. Sunna ætlar að verða nemandi í Listdansskóla Hafnarfjarðar og Bjartur ætlar að fara í Boltaskóla Haukanna og æfa með afa. Pabbinn er byrjaður að vinna á fullu og í fullu starfi, en hann hefur ekki verið það síðan Dagný fæddist. Mamman heldur svo bara áfram að ryksuga með nýju ryksugunni ;o)
Svo má ekki gleyma að við eigum nú smá sumarfrí eftir. Förum aftur á Seyðis bráðum og verðum í viku að knúsa Helgömmu. Það er alltaf næs.

Ekkert bloggstuð

2009-07-24T22:36:00.003Z

Nei, maður er í voða litlu bloggstuði þessa dagana. Vonandi stendur það þó ekki lengi yfir. Við erum nú hætt öllu flakki... í bili... Erum nýkomin heim frá Seyðis. Þar voru allir í dekri eins og venjulega hjá Helgömmu og Braga (afa). Tókum reyndar lítið sætt hús á leigu til að létta aðeins á Múlaveginum því þar var ansi fjölmennt á tímabili vegna LungA. Það var bara voða kósý en alltaf best að vera í Helgömmuhúsi.
Sunna blés allt loft úr sér í sápukúlur þarna fyrir austan og sér ekki enn fyrir endann á því æði. Svo fór hún í prinsessuleik á hverjum degi og skipti reglulega um kjóla sem Rakel frænka átti. Sneri sér svo í hringi fyrir framan spegla og dansaði um og pósaði eins og fyrirsæta þegar teknar voru myndir af henni. Ef þessi stelpa verður ekki söng og leikkona veit ég eiginlega ekki hvað annað!
Bjartur gerðist smiður og negldi nagla í spýtur eins og ég veit ekki hvað. Bjó til kofa í garðinum og klifraði eins og köttur í trjánum. Svo hljóp hann um bæinn eins og hann ætti heima þarna, enda orðinn heimavanur. En hann þorir varla einn út í garð hér heima en svo fannst honum æðislegt sport að hlaupa á undan alltaf í sundlaugina, leikvöllinn eða heim á Múlaveg.
Dagný kom heim allt annað barn heldur en það sem fór í ferðalagið! Hún er svo breytt krakkinn! Komin með aðra tönn og farin að skríða á fjórum, segir mamma, bless, kisa og farin að borða eins og almennilegur krakki.. ekkert mauk alltaf hreint.
Ýmislegt annað var brallað, þó svo að það sé alltaf best bara að hanga í Helgömmuhúsi. Við skelltum okkur á Stöðvarfjörð í Steinasafn Petru. Það var algjör ævintýraferð. Svo heimsóttum við auðvitað Dag og co og fengum að hoppa á trampolíninu og knúsa Kubb nokkrum sinnum og margt fleira. En svo fórum við skyndilega heim vegna veðurs ;o) Það togaði svoldið í okkur að komast heim í sólina...Veðrið var nefnilega ekkert svakalega spennó síðustu dagana. En við förum aftur fljótlega austur... spurning hvort við nennum að keyra aftur. Það er ekki það skemmtilegasta í heimi.

Jæja, ætli maður reyni ekki að skrifa hér nokkrar línur...

2009-06-29T21:07:00.003Z

Það er greinilega annatími núna. Við erum alltaf á einhverju flakki þessa dagana svo maður hefur engan tíma til að blogga, hvað þá að henda inn myndum. Allnokkrir búnir að rukka um þessi atriði og við skulum sjá til hvað við getum gert í þessu;o)

Sunna hefur stækkað ansi mikið undanfarnar vikur. Hún fór loksins í rör og nefkirtlatöku. Þvílíkur munur á einu barni! Hún er allt önnur: Hætt að vera með þetta endalausa, eiturgræna hor, farin að sofa án þess að hrjóta, með betri matarlyst og aftur farin að tala skýrt því hún heyrir núna miklu betur. Svo er hún líka orðin Bangsastelpa. Byrjuð á Bangsadeild eins og stóri bróðir og auðvitað fullorðnast maður heilmikið við það að skipta yfir á stórukrakkadeild...

Dagný er loksins komin með tönn. Hún er reyndar frekar snemma í því miðað við eldri systkini sín. Versta er að hún vill endilega vera að prófa þessa einu tönn svoldið þegar hún er að drekka hjá mömmu sinni...

Bjartur er allaf við það sama: Eeeeendalaust að spekingast og spyr og spyr illsvaranlegra spurninga... Hann heldur manni við efnið drengurinn....

Annars erum við búin að gera ansi mikið af því að keyra austur fyrir fjall. Höfum farið í bústaði og haft það gott í góðra vina hópi. Það eru til myndir af því einhvers staðar. Ætli þær komi ekki inn á myndasíðuna með haustinu bara ;o) Svona miðað við að við erum hvergi nærri hætt að flakka....

Helgamma Hulk

2009-05-20T14:49:00.000Z

Bjartur sagði við Helgömmu að hún væri "sterk eins og Hulk" þ.s. það sást svo vel í æðina á höndinni á henni( alveg eins og á Hulk ).

Áfram Ísland

2009-05-12T22:22:00.002Z

Hér var gleði í kvöld. Júróvisjónpartý. Bjartur gerði langborð hérna í holinu og lagði á borð, þjónastyle. Allir í fjölskyldunni gæddu sér á tacos og burritos yfir byrjunarlögunum... nema Dagný. Hún sat í ömmustólnum sínum með svuntu og matarkex ;o)
Svo þegar allir voru búnir að borða var borðunum rutt til og hið fínasta dansgólf kom þá í ljós. Þegar "Jóhanna of iceland" söng voru allir dáleiddir og stoltir af sinni manneskju. Svo var hasarinn og stuðið orðið svo mikið að náttfötin voru tekin fram og tennur burstaðar og pabbinn búinn að lesa fyrir liðið áður en ljóst var hvaða lönd komust áfram, Logastyle!
Þegar kynnarnir tilkynntu hvaða land færi síðast í undanúrslitin heyrðist í Bjarti:,,Hvað gerðist?" Mamman sagði að Ísland hefði komist áfram í aðalkeppnina. "YESSSSS!" heyrðist þá í okkar manni, mömmustyle ;o)
Það verður sko aftur partý á laugardaginn!

Jæja... orðið svoldið langt síðan síðast.

2009-04-28T22:04:00.002Z

Við fórum með Dagnýju til hjartalæknisins og auðvitað var þetta ekki neitt. Stúlkan er hraust og þarf ekkert að fylgjast með henni frekar. Það er léttir.
Annars er alltaf nóg að gera... Helst í fréttum þessa stundina er að pabbinn á bænum er að fara til Vestmannaeyja næstu helgi. Það verður stuð hjá mömmunni á meðan. Bjartur er spenntur fyrir þessu ferðalagi pabba því hann ætlar að verða fullorðinn þá og hjálpa til með litlu systurnar tvær og poppa á kvöldin og vaka. Þannig er greinilega að vera fullorðinn í hans augum hehe.

Svo styttist óðum í að Helgamma komi. Hún kemur af því að mamman er að fara til Toronto í nokkra daga. En við reynum að hugsa sem minnst um það. Smá aðskilnaðarkvíði í gangi....

Dagný orðin 6 mánaða

2009-04-15T20:49:00.002Z

Fórum í skoðun í morgun. Það kom í ljós að hún þarf að fara í hjartaómskoðun eins og systkini sín. Það kom eiginlega ekki á óvart...og þó...Við fórum í sérstakan hjartasónar þegar hún var í bumbunni, því Bjartur er skráður með hjartagalla, en það kom ekkert í ljós þar. Þannig að við erum bara róleg...Sunna fór líka og ekkert fannst að henni, bara frekjuhljóð ;o)

Við komum heim í gær úr æðislegu páskafríi. Þannig var að Berglind og Nonni fóru norður á Mývatn með krakkana sína. Okkur langaði að gera eitthvað um páskana, enda vön að ferðast í páskafríinu, og ætluðum að skjótast kannski til þeirra á Gautlönd. Loginn kom heim úr vinnunni snemma á miðvikudeginum og fór með þessa hugmynd enn lengra: Gista á Gautlöndum eina nótt og halda svo áfram austur á Seyðis. Klukkutíma seinna vorum við rokin. Komum á Gautlönd um kvöldið, héldum áfram til Seyðis daginn eftir, vorum þar í fjórar nætur, brunuðum svo aftur á Gautlönd og gistum þar eina nótt áður en haldið var áfram í bæinn.

Það var mikið brallað í þessu fríi: Farið var með stóru krakkana á sleða og skíði á Kröflu. Á meðan voru reyndar ungamömmurnar heima á Gautlöndum með yngstu molana. Svo héldum við áfram austur og komum Helgömmu heldur betur á óvart! Hún vissi ekkert af því að við værum á leiðinni og var frekar hissa að sjá okkur fimm live á tröppunum hjá henni!

Við fórum í fjöruferð með Símoni, Ástu og co, þar sem Sunna borgarbarn vildi frekar sitja ein í bílnum á meðan allir voru að leika í sandinum í fjörunni. Það var látið eftir henni eftir að hún hafði staðið og safnað nokkrum skeljum og rignt niður í smá tíma. Eftir fjöruferðina var haldið heim til Símonar og Ástu í kræsingar og leik með Ara Birni og Huga Rafni.

Svo hittum við góða vini sem komu alla leið frá Köben í páskafrí. Það voru þau Harpa, Guðjón og litli Úlfur Stefán og voru þetta góðir endurfundir enda rúmt ár síðan við sáumst síðast! Sunna var ekki alveg að meika það að þessi litli strákur héti Úlfur... Var hálfsmeik við hann bara. Svo kraup Bjartur niðri og var að leika sér á gólfinu akkúrat í gangveginum í eldhúsinu og Úlfur stóð fyrir aftan hann:,,Passaðu þig, Bjartur. Úlfur er fyrir aftan þig." Meint þannig að Bjartur myndi ekki hrinda honum um koll en Bjartur leit frekar hissa við til að sjá þennan úlf sem var svo bara lítill strákur. hehehehe.

Á páskadag fórum við í dýrindis páskamat til Dags og Ingu á Egilsstöðum. Átum á okkur gat og fengum bollaspá hjá Snorra. Bjartur var hálft kvöldið úti í garði hjá þeim að leika við Kubb kanínu. Sunna var inni með teboð á meðan hehe. Hún fékkst reyndar til að kíkja smá í kanínukofann...

Á annan í páskum keyrðum við svo aftur á Gautlönd og fóru stóru strákarnir beint á snjósleðarúnt. Siðan bjuggu þeir til nokkurra fermetra snjóhús drengirnir og buðu Sunnu að koma út að leika. Hún gerði það, daman. Fegin að komast út því það var fluga inní húsinu... Svo borðuðum við góðan mat með góðu fólki, drukkum bjór og fórum snemma að sofa ;o)

Þar hafiði það! Og það var mjöööög gott að koma heim.

TVÍBURARNIR

2009-04-02T22:16:00.001Z

21. maí - 21. júní

Óþolinmótt eftir að hefja leikinn er líklegt að tvíburabarnið hafi sparkað duglega í móðurkviði. Tvíburabörn eru líkleg til að byrja snemma að tala og þau segja sína skoðun frá byrjun. Þau eru mjög forvitin í eðli sínu og þurfa því alltaf að hafa eitthvað fyrir stafni. Þau eiga mjög erfitt með að sitja kyrr og eiga mjög erfitt með að þegja. Athyglin beinist stöðugt að nýjum viðfangsefnum en áhuginn hverfur oft mjög fljótt.
Því fyrr sem tvíburabarnið kemst í hóp annarra barna því betra því tvíburarnir elska félagslíf enda hafa þeir mikla samskiptahæfileika. Það sem þessu barni leiðist er að hafa ekkert að gera, svo vertu viss um að stundatafla þess sé alveg þétt skipuð (íþróttir, klúbbar, útivist o.s.frv.) Vegna þess hve barnið er upptekið og hefur margt fyrir stafni þá eignast það marga vini. Tvíburanum líkar að vera trúðurinn í bekknum og gerir í því að gretta sig og segja brandara. Tvíburinn er fyndinn og býr yfir góðum húmor.. Líf og fjör er tvíburum að skapi.

Tvíburarnir þurfa mikla örvun og hyggilegt er að leikföng þeirra séu margvísleg og vitsmunalega þroskandi, svo sem púsluspil og þrautir af ýmsu tagi.Hugur hans ferðast á ógnarhraða og auðvelt að örva. Vertu viss um að hann hafi alltaf nóg að lesa. Fyrir utan lestur þá hefur barn í tvíburamerkinu einnig mikla unun af því að tala, segja brandara og taka þátt í íþróttum, og það vill gera þetta allt núna strax. Yfirleitt er tvíburinn bráðþroska vitsmunalega og því nauðsynlegt að sinna þessum þætti í uppeldinu með því að reyna að svara t.d. spurningum hans (þær eru reyndar oft ansi margar) og ræða við hann.
Litlir tvíburar eru oft stríðnir og hrekkjóttir en það ber ekki að taka of alvarlega því yfirleitt er meiningin ekki slæm. Hann grípur oft til prakkarastrika til að hrista upp í umhverfinu því hann hefur ríka þörf fyrir tilbreytingu.
Þetta barn fer létt með að gera 3 hluti í einu og er líklegt til að gera þá alla vel. Hægt er að segja um barn í tvíburamerkinu að það sé mjög klókt og komi sífellt á óvart. Það er einnig ósvífið og gæti komið heim með kettling með slaufu um hálsinn (sem það fann) og fært mömmu sinni að gjöf. Sætt, ekki satt?
Þegar þú reynir að sjá fyrir þér barn í tvíburamerkinu þá skaltu hugsa um Línu Langsokk. Hallaðu þér aftur, dragðu andann djúpt og taktu þátt í fjörinu.

Need I say more? Þetta er ótrúlegt! .... spurningarnar, stríðnin, líf og fjör....þrautir, snemma að tala, forvitinn. Passar allt saman

Vogin

2009-03-30T13:28:00.002Z

23. september - 23. október

Börn í vogarmerkinu eru oft glaðleg og broshýr og eru oftar en ekki börnin sem fá bros frá hinum sem bíða á biðstofu læknisins. Þau eru sjarmerandi og heilla aðra upp úr skónum. Félagslyndi einkennir vogina frá fyrstu tíð og litla vogin elskar að hafa margt fólk í kringum sig. Vogarbarn sem þarf að búa við einangrun getur orðið geðstirt, innhverft og óöruggt en þegar allt leikur í lyndi er það opið og hresst. Vogin á mjög erfitt með að gera upp hug sinn og virðist oft hafa lítinn viljastyrk. Þess vegna er mikilvægt að foreldrar hjálpi voginni að rækta með sér sjálfstæði og ákveðni meðal annars með því að fela henni ákveðin verkefni sem reyna á ákvarðanatöku. Líklegt er að Vogin spyrji álits og því er hægt að svara með því að spyrja: "Hvað finnst þér?" Síðan þarf að gefa henni næði til að vega og meta hlutina áður en hún tekur ákvörðun. Vogin er listræn í eðli sínu og mikilvægt að hlúa að þeim eiginleikum og skapa henni aðstöðu til að þroska listræna hæfileika sína.

Þetta á svo vel við að það er eiginlega ekki fyndið!! Og við eigum tvær svona! Gaman gaman.
Þetta með einangrunina þurfum við ekki að hafa áhyggjur af... alltaf stuð á Hjallabrautinni... og viljastyrkurinn og ákveðnin er svo sem alveg nógur hjá Sunnu..... ennþá. Hún er nú bara 2 ára.
Einhvers staðar á ég líka til um Tvíburamerkið. Finn það ekki svona í fljótu.
Gaman að þessu

Sunna hætt með bleyju

2009-03-22T22:42:00.004Z

Í nótt svaf Sunna í fyrsta skiptið án bleyju. Það hafði ekki verið gert fyrr þ.s. við fundum ekki pissulök í RL búðinni fyrr en í fyrradag.

Hún var nú ekki sátt við að verða að fara á klósettið fyrir svefninn. Enda er hún meira fyrir að ráða hlutunum sjálf og fara þegar henni hentar.

Þannig að nú kemur hún reyndar fram ef hún þarf að pissa. Hún læðist eins og lítil mús í dyragættina og biður um leyfi til að fara að pissa. Þegar foreldrarnir hafa samþykkt hleypur hún sigri hrósandi inná klósett og þar þarf allt að vera eftir kúnstarinnar reglu. Fyrst skal prinessu-sessan sett ofan á setuna og svo verður kollurinn hennar að fara undir. Hún getur hjálparlaust komið sér fyrir og gert þetta allt en er svoldið fyrir að stjórna og láta aðra vinna fyrir sig ;) Ef kúkur er á leiðinni er öllum skipað að fara fram og taka til eða gera eitthvað annað en standa yfir henni ;)

Ég er búúúúin að pissaaaaaa heyrist svo eftir smá stund.

Dagný 5 mánaða

2009-03-14T15:14:00.002Z

Þá er Dagný orðin 5 mánaða ótrúlegt en satt! Hún braggast alltaf jafn vel og er algjört undrabarn hvað varðar rólegheit og værð. Hún er farin að gera allt það sem 5 mánaða börn eiga að gera samkvæmt bókinni og gott betur: aðeins farin að æfa sig að sitja. Hvað stærð varðar er hún bara copy-paste af systur sinni. Reyndar ca 200 gr þyngri en Sunna var þegar hún var 5 mánaða en annars eins.
Eftir að Sunna fékk sýklalyfin hefur horið sömuleiðis minnkað hjá Dagnýju. Hún var nú samt eitthvað aum í síðustu viku og við alveg viss um að hún væri komin með eyrnabólgu. Aumingja Dagný... það má aldrei heyrast í henni og þá hlýtur eitthvað meiriháttar að vera að ;o) Það var rokið strax um morguninn með hana til læknis sem skoðaði hana alla og hlustaði....Niðurstaðan var: ekkert að. Stúlkan var samt enn heit og eitthvað aum um kvöldið þannig að aftur rauk mamman á vaktina. NIðurstaðan var:ekkert að.... Við semsagt reyndum að gera hana að eyrnabólgubarni tvisvar sama daginn og það tókst ekki hehe. Nú er stúlkan bara eiturhress og alltaf sama draumabarnið.

Og við höldum áfram að horfa...

2009-03-09T10:03:00.007Z

...á Mama mia. Sunna er enn heima og komin á sýklalyf. Hún er nú öll að hressast og fer á leikskólann á morgun. Alveg magnað hversu mikið slím og hor getur komið úr svona litlum kroppi.... Hún er rosalega dugleg að snýta og taka inn lyfin sín... snýta Dagnýju svoldið og strjúka...breiða yfir hana teppi og gefa henni dudduna eða dót og lesa fyrir hana. Læknirinn sagði okkur að reyna að halda þeim í sundur... það er varla hægt, það er svo mikil systraást í gangi. Við þorum ekki að fara að banna henni að koma nálægt systur sinni því hún hefur alltaf verið svo góð við hana. Viljum ekki vera að skemma það. Litlu kerlingarnar... ;o)

Aðalmaðurinn á heimilinu er duglegur að semja sínar reglur núna... Hann vill að við segjum núna alltaf já við hann... Þó við meinum nei. Af hverju? Jú, við segjum svo oft nei að við erum alveg búin að rugla hann í hausnum! Svo stríðir hann Sunnu. Hvað gerir hún þá? Öskrar. Það er rosalega gaman og prakkarinn fær mikið útúr þessu öskri. Það er ekki annað hægt en að skilja hann...Sunnuöskur er svo skemmtilegt hehehe. Við erum búin að vera að tala um hvort hann heyri illa drengurinn... Hann hefur greinilega heyrt það tal (heyrir ekki verr en það) og um daginn var hann að stríða og Sunna að öskra. Mamman kallar á hann:,,Bjartur! Hættu!" Hann heldur áfram.
Aftur:,,Bjartur! Heyrirðu ekki? Hættu þessu!" Ekki hættir drengurinn. Mamman tekur hann þá frá öskurapanum og segir:,,Heyrirðu ekki þegar ég segi þér að hætta?!"
,,Nei."
,,Þú hlýtur þá að heyra í Sunnu öskra! Þá áttu að hætta."
,,Já en hún öskrar hærra en ég heyri".
.....Hún er nú ekki þekkt fyrir annað en háa skræki og oft kölluð Krían hérna á heimilinu en er sem sagt komin yfir í hátíðnihljóð...(Nú hljómar þetta eins og hún sé alltaf æpandi barnið....)

Jæja.. vaknar yngsti molinn...

Kveðjur,
Mamma og Sunna Dancing queens....having the time of our lifes úúújeee

Unglingurinn Sunna

2009-03-06T12:20:00.003Z

Nú er Sunna búin að vera veik í 4 daga.... Það er búið að glápa á endalaust mikið skrípó. Og Mama mía líka. Svo syngur hún með:,,mammamía. Híjagóa geeee..mæmæ..." En litla konan er orðin leið á ástandinu og farin að hressast líka þannig að eirðarleysið er tekið við. Í morgun mátti mamman ekki snýta og þá hljóp okkar dama inná bað og skellti hurðinni! Þegar hún var búin að væla þar í smá tíma bankar hún á hurðina, tilbúin að koma fram. Þegar mamman opnar skellir hún aftur og vælir á pabba sinn... Svona gekk þetta í nokkur skipti. Svo gaman að henni þegar hún er með þessa "unglingastæla". Það verður stuð á bænum þegar þetta verða ALVÖRU unglingastælar... Svo lyftist nú brúnin þegar litla systir vaknaði og lífið er allt annað. Núna eru þær í mömmuleik, Sunna er ofurumhyggjusama mamman og Dagný greyið segir ekki bofs við öllu þessu dúlleríi.

Bjartur er kominn með ný gleraugu. Óbrjótanlegu gleraugun brotnuðu um daginn. Sem betur fer vorum við enn í ábyrgð þannig að hann fékk ný án þess að þurfa að borga neitt. Þau eru eiginlega alveg eins og gömlu, bara aðeins blárri ;O) Já það er óhætt að segja að við séum fastagestir í Augnsýn....ef það eru ekki gler, þá eru það nefpúðar, stillingar eða bara heilu brillurnar!

Annars eru nýjar febrúarmyndir komnar...

Öskudagur

2009-02-25T21:20:00.006Z

Það var spennandi að vakna í morgun og fara í leikskólann. Bjartur var ekki alveg búinn að ákveða sig með búning og vildi helst blanda öllu saman. Fyrir valinu varð svo Incredible búningur sem hann fékk að láni hjá Emil Gauta. Sunna fór sem Minna mús. Flottust.
Strákurinn okkar er orðinn svo stór og mikill munur frá því á öskudeginum í fyrra. Þá vildi hann (og fékk) að vera Gríslingur. Núna var það: Batman, Súperman, úlfur eða Íþróttaálfurinn. Ekki eins krúttulegt og í fyrra ;o) En Sunna sá um krúttulegheitin fyrir allan bæinn held ég! Hún er þvílík dúlla sem Minna mús! Næstum æt hún er svo sæt.

Allt sem er rautt, rautt finnst mér vera fallegt...

2009-02-19T14:46:00.004Z

Pabbinn sótti stóru krakkana snemma í leikskólann í gær því Hallur afi var búinn að bjóða þeim að koma og skoða leikmyndina af Kardemommubænum í Þjóðleikhúsinu. Þetta var skemmtileg upplifun. Að fá að standa á sviðinu og labba um og skoða allt saman! Og Hallur afi setti sviðið af stað og þá fannst Sunnu hún vera að detta og riðaði til, þó hún stæði ekki einu sinni á snúningssviðinu hehe. Á morgun förum við svo öll að sjá Kardemommubæinn...nema Dagný. Amma og afi ætla að passa hana á meðan.

Splæst var í nýja úlpu á Bjart um daginn. Mamman fór í bæinn og keypti bláa úlpu á drenginn sinn. Þegar hún kom heim vildi hann ekkert bláa úlpu, heldur rauða! Uppáhaldsliturinn er sko rauður ef það hefur farið framhjá einhverjum... Þannig að úlpunni var skipt og litli maðurinn frekar sáttur! Svo seinna getur Sunna tekið við úlpunni og jafnvel Dagný líka (bjartsýn?). Fyndnast var þó hversu hissa afgreiðsludömurnar voru:,,Vildi hann frekar rauða??" Eins og það væri alveg bannað...Maður er sko ekki Haukamaður fyrir ekki neitt ;o)

Um helgina er Bjarti boðið að fara á rúntinn með Valgeiri og Þyrí. Þau ætla að gefa kannski öndunum brauð ef veðrið verður gott. Litli ástarpungurinn tók andköf af gleði þegar honum var sagt að hann myndi hitta Þyrí. Þvílíkt krútt.
Svo ætlum við að fara í afmæli til Emils Gauta, vinar okkar, í Bjarkarhúsið. Það verður sko stuð. Alltaf nóg að bralla á Hjallabrautinni...

Sjáumst!
Bjartur púlli - Sunna sæta - Dagný dúlla.

Dagný hló í gær

2009-02-15T00:08:00.002Z

og það var stórkostlegt! Allt í einu varð lífið 100 sinnum betra. Mamman var að syngja fyrir hana og dansa og hún hló! Hún er allt í einu svo stór, farin að hlæja svona upphátt. Svo mikil manneskja eitthvað. Henni finnst eitthvað vera fyndið! Magnað alveg. Þetta er með því sætasta sem maður hefur heyrt.

Love is in the air...

2009-02-11T15:16:00.002Z

Bjartur er ástfanginn. Hann elskar þrjár. Tvær leikskóladömur sem eru með honum á deild og svo Þyrí, kærustuna hans Valgeirs. Þau turtildúfurnar pössuðu Bjart og Sunnu í gærkvöldi meðan mamman og Dagný fóru í kellingaheimsókn og pabbi fór að hnykkla vöðvana.
Um leið og þau komu bað Bjartur um hjálp við að skrifa: "Ég er skotinn í þér" á blað til þess að gefa Þyrí. Svo héldu ástarjátningarnar áfram fram eftir kvöldi. Hann bað hana meira að segja að skrifa á blað að hún ætli að koma í heimsókn eftir nokkra daga! Einn að tryggja sig hehe.... eins gott að hafa þetta skriflegt sko! Já hann er sko með stjörnur í augunum yfir henni- enda yndisleg stelpa. Hún er líka heilluð af honum og ekki amalegt að fá svona flottar barnapíur...Valgeir var samt feginn að enginn kúkaði hahahahaha...Ekki alveg hans deild.

Dagný er 4 mánaða í dag. Hún fékk graut í fyrsta skipti í gærkvöldi. Stúlkan var alveg æst bara í grautinn! Það fengu allir að halda í skeiðina og troða uppí hana ;O) Þvílík spenna. Pabbinn stóð sig líka eins og hetja með myndavélina þannig að von bráðar fá allir að sjá það þegar Dagný fékk graut. Hún var líka sú ánægðasta- með alla þessa athygli og gleypti við grautnum. Leikurinn verður endurtekinn í kvöld og gaman að sjá hversu lengi þetta verður svona spennandi í augum systkinanna....

Sunna þarf ekki brillur!

2009-02-05T15:12:00.007Z

Og það þarf ekki að fylgjast neitt sérstaklega með henni. Stúlkan stóð sig eins og sönn dama og læknirinn svona glimrandi ánægður með hana. Hún gerði allt sem hún átti að gera og alveg yndislegt að fylgjast með henni. Litla ráðskonan. Það var alveg eins og hún hefði mætt þarna áður og gert þetta allt saman mörgum sinnum. Þannig er hún alltaf: Hún sko Á pleisið! Læknirinn sagðist yfirleitt þurfa að slást við krakka á þessum aldri hehehe. En hann tæklaði þetta alveg frábærlega enda þaulvanur.
Meðan við biðum eftir að fá seinni dropana í augun skoðuðum við aðeins gleraugu á svona litla krakka. Henni finnst þetta náttúrulega svakalegt sport því Bjartur notar gleraugu. O my god! Hún er nú þvílíkt krútt með svona lítil og sæt krakkagleraugu... en þau héldust samt varla á trýninu á henni þrátt fyrir krækjur bak við eyru og aukanefpúða.

Dagný er enn að berjast við kvefið og smá hitavella í henni. Ætli við förum ekki með hana til læknis á morgun ef hún lagast ekki... Maður er samt orðinn svo sjóaður í þessu- þykjumst alveg vita hvaða svör við fáum: Hitinn er ekki hár....Hún er að drekka vel.... Tvö leikskólabörn á heimilinu....Við erum ekkert að stressa okkur enda skítakuldi úti. Svo leiðinlegur þessi árstími!! En hún er alltaf jafn yndisleg- aldrei lætin í þessu barni þó hún sé slöpp.

Þannig voru fréttir dagsins!
Yfir og út

Litli Glámur

2009-02-02T23:21:00.005Z

Þá er einkasonurinn kominn með ný gler. Hann fékk þau núna seinnipartinn og er búinn að vera með nefið í öllu síðan. Byrjaði strax í gleraugnabúðinni að grandskoða og útskýra mynstur og svona fyrir mömmunni og afgreiðslukonunni. Mamman hló að honum en afgreiðsludaman hálfvorkenndi honum. Greyið- loksins sá hann almennilega. Ekki nóg með að gömlu glerin voru orðin svo rispuð þá voru þau heilum einum of dauf fyrir hann. Núna er hann sko flottastur, annað augað aðeins stærra bakvið glerið en hitt.
Sunna er ekki enn farin til augnlæknisins. Við förum í það ævintýri á fimmtudaginn. Smá stress í gangi varðandi það... Við vorum svo viss um að Bjartur þyrfti ekki gleraugu. Fórum eiginlega bara með hann til augnlæknis uppá grínið. Af því að hann skáskaut augunum í 3oghálfs árs skoðun. Þannig að í þetta skiptið búum við okkur undir að litla trýnið þurfi kannski bara gleraugu... vonandi ekki samt. Kannski hégómalegt að segja svona og margt verra en að þurfta gleraugu, en þetta er samt smá mál fyrir svona litla krakka.

Loginn setti inn nýjar myndir. Í nýtt albúm merkt 2009 hér til hliðar. Endilega tékkið á þeim. Makalaust hvað þau stækka hratt!